政情：家姐曾患腎病幸得以續命 王恭浩力推器官捐贈
尋日政府宣布委任十位新成員加入器官捐贈推廣委員會。其中一位新委員，係國際獅子總會中國港澳三○三區總監王恭浩。對於今次任命王恭浩，話係另一個服務社會嘅機會，況且獅子會向來都好支持器官捐贈，平時除咗呼籲會員登記成為器官捐贈者之外，都有幫手做吓推廣。
十新成員入推廣委員會
講起器官捐贈，王恭浩都可謂有深切體會。原因係佢嘅大家姐過去曾罹患腎病，幸好獲得另一位家姐捐出合適器官，先至得以續命。所以佢好認同器官捐贈，有必要向社會大眾推廣。然而坊間尚有部分人因宗教理由或某啲緣故，對器官捐贈較為抗拒，但佢相信宗教都應該同意救助他人，唔排除將來有改變嘅機會。
至於其他新委員，仲有香港中小企業聯合會第一副主席鄭仲邦、菁英會會員何仕明。而再度獲委任嘅委員就有東華三院前主席施榮恆、香港藥學會會長龐愛蘭等十二人，任期直至二○二二年四月十四日，為期兩年。