政情：疫情中任總裁 曾迦慧電郵自我介紹
香港樂施會高層有人事新安排，曾迦慧獲任命為總裁。據悉，香港樂施會曾透過內部申請同向外招聘，尋覓總裁人選，結果都認為服務香港樂施會已經十八年嘅曾迦慧最宜擔當此職，佢經過一個月嘅交接期之後，於上星期正式履新。但可能礙於疫情，佢要到尋日，先至透過電郵向外界介紹自己。
曾任港澳台扶貧研究總監
從余志穩手上接過總裁職務嘅曾迦慧話，感謝余志穩喺擔任署理總裁期間，不畏艱難應對各種挑戰，對樂施會嘅持續發展作出極大貢獻。而佢亦提到今年受到疫情影響，香港以至全球經濟及營運環境皆受嚴峻考驗，貧窮人更首當其衝，所以佢今後必定全力以赴，團結同事、合作夥伴同公民社會嘅力量，帶領樂施會喺滅貧路上走得更遠。本身係兩女之母嘅曾迦慧又話，希望大家可以一齊努力克服危機，為下一代建立美好同健康嘅未來。
至於曾迦慧嘅個人簡歷，就係佢出任香港樂施會總裁之前，任職香港、澳門同台灣項目研究總監，領導三地多個扶貧發展、研究、倡議、教育同人道主義救援項目，以解決本地同全球嘅貧窮問題。佢過去亦取得美國哈佛大學公共行政學碩士，以及香港中文大學社會工作學士學位。