政情：澳洲買唔到口罩 徐珊雯拆舊衫袋縫製
靈活變通從來都係港人嘅特色。香港鐘表業總會前副會長徐珊雯早前到澳洲度歲，後來礙於疫情，無奈喺當地延留至今。雖然澳洲地廣人稀，但口罩仍十分渴市，可以話有錢都未必買得到，於是佢退而求其次，自行縫製布口罩，不過喺欠缺衣車之下，到底佢係如何辦到嘅呢？
防護力稍遜 勝在夠環保
徐珊雯話其實好簡單，佢只係拆除舊衣物嘅衫袋，再稍為用針線修改一下，就成為緊貼面形嘅口罩喇。論防護效果，的確係比唔上工廠生產嘅外科口罩，不過就勝在夠環保。況且當地人雖盡量保持社交距離，然而一旦置身公共場所，有個自製嘅布口罩隨身，無疑係會增添一份安全感。佢又話自己雖然係從事鐘錶業，但由於爺爺同爸爸都係裁縫之故，所以有關針黹之事，自小就難佢唔到。想當年中學畢業參加謝師宴時所穿嘅整套衣服，都係出於自己之手，所以縫製口罩對佢嚟講，輕而易舉喇。