政情：政府抗疫為名削撥款 17區會齊嗌撤回

點解要削減區議會撥款？民政事務局及民政事務總署回覆查詢時話，因應社區出現嘅突發情況，包括最近嘅新型冠狀病毒疫情，政府有需要預留更多資源處理突發事宜，例如制定抗疫措施同活動以推動社會各界一齊抗疫。因此政府需要增加社區參與計劃下嘅應急費用，而撥畀十八區區議會用以推行社區參與計劃嘅撥款額都會因而有所調整。

葵青區被減逾百五萬

據了解，各區議會嘅削減撥款嘅比率唔同，葵青區議會撥款較去年度少百分之五點六、逾一百五十萬元；油尖旺區議會被削百分之四點一、約一百萬元；南區區議會則被削減約百分之四、共七十六萬元；大埔區被削百分之三點五、共八十一萬元；深水埗區議會被削減百分之二點九、約七十六萬元；荃灣區議會就係百分之二點六、約五十七萬元；東區區議會被抽起逾百分之二、約六十多萬元；沙田區議會被削百分之一點七二、近五十六萬元；西貢區議會僅削百分之零點零一五、近四千元。

促劉江華落區作解釋

班區議員對此怒火沖天，炮轟政府借抗疫為名，打壓為實。身兼葵青區議員嘅「雙料」議員梁耀忠狠批政府無謂，完全唔接受民政署話因「應急計劃」而削撥款嘅講法。佢覺得好多區議會都需要撥款去做抗疫工作，又擔心如果由政府做中央統籌，好多物資同措施反而未必真正落地，「不如都係畀番區議會自己搞好過啦」。佢又認為劉江華有必要親身落區議會解釋，更係應該要撤回「削撥款」呢個決定。

同樣喺雙料議員嘅尹兆堅就批評「削撥款」嘅舉動，只係政府以一個冠冕堂皇嘅藉口，去針對今屆以民主派為主嘅區議會嘅行為。佢同另一「雙料」議員鄺俊宇將會去信劉江華，要求劉解釋清楚抽撥款嘅理由。

深水埗區議會主席楊彧批評削撥款係政治打壓，矮化區議會，以政治凌駕民生，直指民政署係以抗疫之名，打壓區議會為實。油尖旺區議會副主席余德寶認為民政事務局削減撥款有少許「政治考慮」，指油尖旺區議會被削減百分之四點一嘅開支，比其他區議會削減嘅百分之三幅度仲要高。