中環出更：分錢拗餐死 羅庭德林卓廷互轟

事緣身兼北區連線成員嘅北區區議會主席羅庭德想撥款二百二十萬元畀「在地經濟及文創工作小組」搞在地旅遊，建議亦獲得鄉事派支持。但白鴿黨就唔同意，認為本港當務之急係防疫抗疫，應該將最多資源放入「新型冠狀病毒工作小組」先啱。

白鴿黨議員林卓廷喺會上話事有緩急輕重，認為發展在地旅遊經濟係要做，但唔一定依家做，覺得買防疫物資保障市民健康先係最急最重嘅事。佢建議將「新型冠狀病毒工作小組」嘅撥款由一百萬元增加至二百萬元，而增加嘅款項可以透過削減「在地經濟及文創工作小組」同「保安事務委員會」嘅撥款得出。

林被嘲似街市論政

羅庭德就覺得林嘅建議太籠統，冇講清楚嗰二百萬元撥款點，仲嘲笑林「唔好似街市論政」，強調作為議員發言要慎重有理據，而林即還擊叫羅作為主席要「畀多少少肚量」，唔好聽到唔同聲音就「開口埋口貶低他人意見」。

傾咗兩個鐘都未表決到，鄉事派區議員侯志強多次叫大家唔好嘥時間快啲投票表決，但數度要表決時又有人提出新疑問作罷，令侯都谷爆發難大鬧班議員「玩嘢嘥時間」。另一鄉事派區議員李冠洪都鬧爆佢哋講防疫係「得把死人口」，覺得佢哋開會咁耐又聚人好自相矛盾，最後鄉事派仲嬲到離席抗議添！

卓妮