中環出更：小學三年級領唱 李家仁：音樂帶來正能量

雖然李家仁喺中學時代，已經係學校管弦樂團裏面嘅小提琴手，不過佢喺音樂領域嶄露頭角，就要數小學三年級，當時由佢獨自帶領全校同學唱院歌，佢目睹一眾同學都跟住唱之餘自己又冇走音，當然係好高興喇，不過他人嘅讚賞同鼓勵，亦令佢有足夠嘅信心，咁多年來歌唱嘅動力都源源不絕。

王憓家中創抗疫曲

有「二胡王子」之稱嘅香港二胡藝術中心主席王憓（Ray），亦好明白疫情底下大家鬱悶嘅心情，不過正面啲去睇，呢段時間正好畀大家沉澱一下，睇清楚周邊嘅環境以及計劃將來。由於社交活動大減，咁就有機會做番一啲平日好想做，但因為忙得滯而做唔到嘅嘢。而佢近日「宅」喺屋企，就多咗同囝囝相處嘅時間，又將自己嘅作品與其他同好分享，多咗交流，從中啟發更多靈感。早前有日本二胡研究者研究過阿Ray嘅創作，話佢編寫嘅二胡樂曲特別適合生活繁忙、壓力沉重嘅城市人聆聽，甚至有助於治療失眠同情緒低落。而Ray亦喺呢段時間創作咗一首抗疫樂曲，希望盡快搵到填詞人同歌手合作，憑歌曲為市民帶來正能量。

中學時代嘅李家仁（中）已經為學校管弦樂團擔任小提琴手。	王憓將自己嘅音樂作品與其他同好分享。	李明哲透過彈鋼琴，憑樂韻抒發情緒。

虎豹樂圃執行董事李明哲（Sheryl）話疫情橫掃全球的確令人不快，但幸好可以透過彈鋼琴，憑樂韻抒發情緒。儘管禁聚令下Sheryl仍要上班，但閒暇時間較往常多，得以探索爵士樂、或有關音樂治療等過去較少涉獵嘅音樂形式。除此之外又享受下廚樂，嘗試自行烘焙麵包糕餅咁話。

卓妮