中環出更：內會選主席無期 陳健波倡改議規
今個立法年度會期過咗超過一半，立法會內務委員會仍然停留喺選主席嘅程序上，內會停擺令大量法案冇辦法處理，儼如「法案黑洞」。保險界議員陳健波（波哥）尋日拍片，鬧爆現時主持內會選舉嘅法律界議員郭榮鏗，質疑佢聲大夾惡玩咗半年都選唔到主席，理應要減一半人工。
波哥首先提到，話以前內會主席選舉只需要用十幾分鐘，但依家搞咗半年、開咗十四次會都選唔到主席出嚟，令議會冇辦法進行審議法案呢項天職。佢又引述郭榮鏗指自己依足規矩嚟做，指出歷史悠久嘅議事規則係假設議員做事會正正當當，諷刺郭嘅做法並唔係正人君子所為。
促由秘書處負責程序
波哥又話，面對依家有啲議員講到明要癱瘓議會，以攬炒行為迫使政府達到佢嘅政治目的，要解決問題嘅話可以靠修改議事規則，改由秘書處職員負責選主席程序。佢提到，新一屆議會組成後，大會、內會、財會，其餘十八個委員會都要選主席，若仍然沿用現行做法、由最資深成員作主持嘅話，分分鐘要等一年半載先可以選到主席，到時議會就會乜嘢都做唔到，最終受害嘅就係全體香港市民。
卓妮