政情：報警控外傭聚集 仇栩欣3句鐘即跪低
疫情當前，政府訂立「禁聚令」限制人群聚集。東區區議員仇栩欣昨午喺Facebook（Fb）發貼，指其選區每逢假日都會有大批外傭聚集喺快遞公司門口包裝快遞，仲話擔心佢哋聚集後染病嘅話會造成屋苑大傳染，又話已要求警方定期到現場對聚集嘅外傭作出檢控。但呢個Post出街後隨即被圍插，搞到佢要喺唔夠三個鐘頭，就迅速「跪低」！
違過往立場 惹泛民批評
查實有唔少泛民都不滿「禁聚令」，變相令警方可以行使更大權力，而仇喺舊年年中亦曾被警方拘捕，所以佢今次以報警方式處理外傭聚集，就惹嚟質疑同佢一直要求限制警權立場相違。另外，亦都有唔少人提醒仇要照顧番外傭嘅權益，更加有人用種族歧視嚟批評佢。
事隔唔夠三個鐘，佢再次出貼解釋自己想處理外傭聚集情況嘅原因。不過，面對唔少網民同泛民中人批評佢搵警方執法時，佢就迅速「跪低」，話未來會轉為同食環署商討點處理咁話喎。