政情：疫下就業難 盧偉國促保工程界新血
受疫情影響，本港經濟持續下行，好多公司都選擇凍薪裁員，同時減少聘請新人。工程界議員盧偉國（WK）尋日喺Facebook（Fb）上發貼，話同啲大學教授都好擔心工程界新畢業學生同年輕工程師嘅生計，呼籲政府要幫手力保呢批生力軍嘅就業。
政府早前公布新一輪抗疫紓困措施，WK喺Fb上話認同政府要創造多啲職位，同自動延長學生貸款嘅免息還款期，但佢話同啲大學教授都好擔心工程界新血嘅生計，指依家因為經濟下行令到企業減少聘請新人入職，對想走上工程專業道路嘅年輕人造成相當大嘅打擊。
倡政府助增實習機會
WK又話參與HKIE Scheme培訓計劃嘅實習工程師喺現行制度下，可以得到職業訓練局每月逾五千元嘅補貼，為期十八個月。不過，佢就擔心工程公司喺依家嘅經濟環境下會減少實習機會，呼籲政府要力保呢批生力軍嘅就業，例如喺「保就業」計劃中進一步幫助呢批實習生，等佢哋可以有適當嘅入職培訓機會，業界就可以培養到接班人喇！