政情：新工會申請海嘯式增加 羅致光：五十年至搞得掂

新登記申請較前年升百倍

鑑於唔少人成立工會，所以職工會登記局處理新職工會登記進度都引起關注。羅致光尋日喺網誌提到新職工會嘅登記申請數字，話喺二○一八年只有十六宗、二○一九年有一百四十二宗、喺今年一月至三月就多達一千五百七十八宗，增幅比上年多十倍，比起前年係增加一百倍，其中喺今年三月仲有成九百七十八宗，而仲處理緊嘅申請，佢就話仲有一千六百零七宗。

羅致光話登記局往年只係需要處理十至三十宗，仲形容依家嘅申請係「海嘯式」添！至於點解決，佢話已調配咗勞工處嘅人手，包括有十一位勞工事務主任職系同埋一名文書職系嘅職員，粗略估算人力係增加咗十二倍。佢仲話預計四月內可以處理到約六十宗申請，其餘嘅千五宗就要等到五月後先處理到喇！

喺功能界別選舉中，有部分團體票係以工會做單位，有啲仲要相關工會運作咗一年先有投票權。眼見依家就算增加人手，但仲有逾千宗申請要等五月後先處理到，睇嚟有部分工會未必趕得切喺嚟緊嘅選舉中投票。對於羅致光話唔加人手就要用五十年時間處理，民主派議員朱凱廸就反問，依家加咗人手係咪用十年就可以處理晒呢？

調配人手恐阻礙原有服務

當局會唔會顧此失彼？勞工界議員潘兆平擔心當局依家調配人手處理工會申請，會影響勞工處原有嘅其他服務。同為勞工界嘅議員何啟明都有同樣擔心，仲話依家政府提供有限度服務，擔心冇人手處理啲勞資糾紛添！