中環出更：經濟不景 吳國安假期愁爆行公園
喺呢幾日復活節假期，唔少市民都出街搵節目，但有啲人寧願留番喺屋企減低風險喎。香港中華廠商聯合會（廠商會）副會長吳國安都唔敢走得遠，淨係喺屋企附近嘅公園行吓，但見佢一臉愁容喎，究竟發生乜嘢事呢？
吳國安話一來係悶；二來係覺得經濟環境差，冇乜心情。佢話好多中小企冇生意、又要出糧，境況悽慘，急需政府嘅協助，好似政府啱啱公布話派「半糧」就應該快啲公布詳情同快啲派，事關呢筆係救命錢，又話政府唔好將啲嘢簡單複雜化，「有強積金供款紀錄，點會呃到！」佢仲話全民派一萬蚊都要快，好似之前派四千蚊都搞十九個月咁耐，行政費高達十億元，呢筆行政費攞嚟派，仲多人受惠喇！
黃偉鴻留家耍太極
廠商會會董黃偉鴻（Ellis）放假期間就留喺屋企耍太極啦！Ellis話太極強身健體之餘，實戰都好有用，但就從未諗過同人切磋，都係打算養生啫！佢學咗太極已十年有多，最近因為疫情關係多咗時間喺屋企，仲話「人哋上網學習，我就上網睇人打拳。」至於有市民喺假期出街玩，Ellis就話市民都有避免近距離接觸，又遵守指引少於四人同行，覺得情況都屬正常嘅。
另外，中西區區議會前副主席陳學鋒尋日就化身「家庭主夫」去買餸喎。佢話最近唔少地區工作受到疫情影響而取消，變相真係可以放假喇，而佢咁多年嚟都唔識玩扭計骰，最近想挑戰吓自己所以開始嘗試。至於有冇打算出街玩？佢話雖然好想出去行，但最後都係乖乖哋喺屋企，陪小朋友打吓機就算啦！佢對市民出街行吓嘅行為表示理解，但話現時疫情反反覆覆，呼籲市民自覺，唔好搞到防疫工作變差喇！
卓妮