政情：科技園改建實驗室 加快口罩生產
新冠肺炎疫情持續，防疫物資短缺，香港科技園改建廠房同更改實驗室用途為無塵空間，以及提供技術支援，供科技業界作生產口罩之用。科技園公司主席查毅超表示，科技園喺今年二月開始為香港科學園、創新中心同工業邨嘅租戶寬免六個月嘅租金，但難以預計會唔會延長免租。
援助初創企業
查毅超話免租並唔係長遠做法，科技園公司嘅生意需要持續發展，科技園會視乎租戶受疫情影響嘅情況提供協助。科技園又喺三月針對培訓計劃推出財務支援措施，三個創業培育計劃嘅成員（Incu-App、Incu-Tech及Incu-Bio），可獲額外嘅資金補助，每間公司的資助總額上限為七萬五千元。
佢又話基於舊年嘅反修例示威同今年嘅疫情，投資者嘅態度變得謹慎。佢話如果初創企業喺融資階段遇上壓力，科技園會喺資金層面上提供援助。佢又話，雖然科技園早前有幾十間公司退租，但暫未出現大規模退租潮。佢話唔能夠斷定退租源於社會事件同疫情，認為係企業嘅商業決定。