政情：交通燈被扑 大半年未整好 前區議員鬧爆現屆
交通燈係關乎道路安全嘅重要設施，不過喺反修例示威當中，就屢屢遭到破壞。前九龍城區區議員黃以謙尋日喺Facebook發貼話，佢留意到佐敦一帶，有交通燈被扑爛後到依家都未整番，仲hashtag指「淨係搞時代革命唔理地區民生」，擺明寸爆現屆油尖旺區議會唔做實事。不過現屆尖東及京士柏區議員朱子洛即刻代同事回擊，留言話已經去信路政署跟進喎。
話說黃以謙尋日途經佐敦道同覺士道交界，見到該處嘅行人過路燈及交通燈「自從舊年七月有人搞『革命』，連續三次畀人扑爛咗之後，到依家仲未整番。」佢又指有坐輪椅嘅朋友，喺上述位置過馬路時險象環生，搞到佢都忍唔住要出聲話「依家油尖旺區議會係咪轉咗淨係搞時代革命唔理地區民生啊？」又反問交通燈過咗半年都無人理係誰之過？
同屬油尖旺區議會嘅朱子洛見到個貼文之後，就即刻幫佐敦嗰邊嘅區議員執漏，喺貼文下面留言，「咁啱見到你facebook（Facebook），幫你出咗（信去路政署）了，唔使客氣」咁喎。
黃睇過留言，就質疑朱撈過界，暗諷佢「乜依家轉咗規矩，唔係自己嗰區自己理咩？」而朱就反駁，話現屆區議會實行大同理念，譏黃「唔知前朝做法係點」，話只要係油尖旺區內，幫得到就盡幫咁喎。