政情：研轉數快派錢卸膊 楊偉雄自嘲小角色
政府話「全民派一萬元」嘅目標係，七月份畀市民登記、暑假期間開始派錢，已經被鬧爆太慢。有議員就希望創新及科技局跟進用轉數快派錢嘅方法，點知局長楊偉雄回應話，創科局只係協助角色，但堅稱局方對縮短派錢時間有貢獻喎。
又話有貢獻 自打嘴巴
呢頭話創科局僅屬協助角色，嗰頭又話對事件有貢獻，唔知局長嘅意思係咪創科局喺派錢過程中，只不過係小角色呢？其實早前已有多位議員向政府查詢轉數快嘅使用情況。但根據政府嘅答覆，喺一九年十一月起，政府接受市民以轉數快繳付稅款、差餉、地租同水費，而截至二○年二月，市民使用轉數快繳費佔有關全部個案約百分之六咋。
唔單止有議員要求跟進轉數快派錢嘅可能性，另有議員質疑「全民派一萬元」需要十億元嘅行政費過高。其實，班議員咁緊張，都係想市民可以快啲攞到錢，唔使重蹈關愛共享計劃派四千元嘅覆轍啫！