政情：促罷工醫護釘牌 葉劉惹火遭圍攻

秋後算帳 難紓人手短缺問題

數千名公立醫院醫護人員喺二月初發起五天罷工，要求港府實施全面封關抗疫。葉劉淑儀尋日喺會上就話，醫管局應該嚴肅處理早前參與罷工嘅醫護人員，若果唔採取紀律處分，將會縱容佢哋日後動輒罷工，無法保障市民健康。佢又建議，醫委會對於曾經參與罷工、而未獲專科資格嘅醫生，唔應該畀佢哋註冊，因為佢哋喺醫管局做夠就出去賺錢，唔係為病人健康着想。

葉劉講完，醫學界議員陳沛然就批評有人藉事件「抽水」，認為醫護人員係以生命保護市民，佢哋喺抗疫期間都唔敢返屋企，反而要暫住酒店。衞生服務界議員李國麟亦批評，有人以文革式批鬥抹黑醫護人員，鼓吹秋後算帳，教唆醫委會拒絕發放專科牌照，無助解決醫護短缺問題。

呢頭鬧醫護 嗰頭為前線打氣

至於葉劉淑儀前日喺佢Facebook（Fb）專頁上載咗「一起鼓掌」嘅影片，連同政府主要官員一同參與，佢哋為企喺抗疫前線嘅醫護人員打氣。議員黃碧雲就斥責有人呢頭話要懲罰佢哋，嗰頭又向佢哋鼓掌，認為秋後算帳係絕不可以原諒嘅行為。

不過，醫管局行政總裁高拔陞就話，留意到二月初有大量前線同事，因為唔到嘅理由缺勤，當局會根據人事程序及法律去跟進，但未有回應會唔會對罷工醫護進行秋後算帳。

葉劉會後喺Fb貼文，解釋喺財委會特別會議上提出處分罷工醫護同着緊呢件事嘅原因，話係因為佢所屬嘅政黨確實接收到巿民受醫護罷工影響嘅個案，情況令人髮指，仲上載咗段短片，林女士現身說法，係因醫護罷工而令視力無法恢復，恐成終身殘障。林女士仲話唔想再見到醫護人員再次發動罷工，出現更多好似佢一樣嘅受害者。

唔知當時參與罷工嘅醫護人員睇到林女士呢段短片，聽到佢所受到嘅遭遇，會有乜嘢感想呢？