中環出更：電子手環用唔到 創科局死撐運作正常
電子手環雖有助當局監察市民家居檢疫，但推出初期出現嚴重「甩轆」情況。立法會特別財委會尋日討論新一份預算案中有關創新科技嘅撥款，創新及科技局常任秘書長蔡淑嫻面對議員質疑電子手環嘅可靠性，就死撐話絕大部分電子手環都能夠有效使用，初期出現嘅問題都已經解決咁話。
話99 %冇問題
喺會議上有議員指「有三分之二嘅手環係唔work（無法使用）」。蔡淑嫻認為相關說法並唔正確，佢強調無論係追蹤手環，抑或係掃描二維碼啟動檢疫程式嘅監察手帶，超過百份之九十九都冇問題，只係局方資源有限嘅情況下匆忙推出措施，加上同一時間有大批回港市民需要下載程式及啟動手帶「做唔切」。有問題嘅手環當局已立即更換，問題已經解決。
議員黃碧雲則關注，創科局指要推動本港「再工業化」，但疫情凸顯本港欠缺工業嘅問題，問當局如何協助本港喺防疫物資上毋須依賴外地。創科局局長楊偉雄回應指，口罩短缺是全世界面對嘅問題，而現時本港市面仍有口罩供應，形容係值得鼓舞。楊強調，本港要發展高增值、少勞動嘅工業，又形容「本港有百分之八十嘅食物都係外地輸入」。
卓妮