中環出更：居家避疫有得着 羅台秦同外傭更投契
人係社會性動物，因此大家都不甘於孤僻嘅生活。仁愛堂前主席羅台秦近日居家避疫，不時透過手機同電腦，同外界嘅朋友見吓面、傾吓偈。由於身處家中得享清閒，令佢深感時下嘅視像通訊的確可以突破空間限制，利於保持人際聯繫，不過要促進相互了解，咁就真係需要時間喇。
羅台秦話以前自己職務纏身閒暇甚少，如今大把時間就反而不宜外出，自不然就同家中嘅外傭姐姐打下牙骹，結果主僕之間愈講就愈投契，而佢囡囡亦善用空閒時間，同外傭姐姐合力炮製湯水畀大家品嘗。至於當晚會煲邊款湯水呢？佢話係有助潤肺防疫嘅百合節瓜煲瘦肉。雖然湯仲未到嘴邊，就已經甜在心裏咁話。
香港青年工業家協會執行委員沈慧林（William）除咗同同事開會之外，近日亦經常透過視像通訊，同大學生做交流分享。佢發覺以前面對面傾談，每到發問環節好多學生都怯於開口，但改為視像之後，學生反而踴躍發問，有時啲問題仲好尖銳添。因久坐於電腦面前同鍾意食零食，導致肚腩漸大，William話一有時間就上網睇吓極速瘦身嘅運動然後跟住做，否則佢恐怕自己嘅腰圍會一發不可收拾。
周伯展在家工作不忘護眼
香港眼科醫學院前院長周伯展，就話居家工作難免長期對住電腦屏幕，為免對雙眼構成不良影響，佢認為屏幕需要調校至柔和光度，天花燈光必須亮起且要強過屏幕亮度，而屏幕唔反光就最好。距離方面，手提電話最好同雙眼保持四十厘米距離，手提電腦就要五十厘米，至於座枱電腦就要有一百厘米，每隔二十分鐘就要稍事休息。佢又話多啲眨眼分泌淚水，不時將目光投向遠處景物，對保護眼睛都有一定幫助。
卓妮