政情：社交戒嚴仍夜歸 林宇星被老婆詐型
政府早前頒下「社交戒嚴令」，限制公眾地方唔可以多過四人聚集，以減低新冠肺炎疫情傳播。不過當戒嚴令生效導致好多社區活動都無奈告吹，亦唔等於多咗時間返屋企陪伴身邊人。地區組織公民力量發言人林宇星（阿星）就話，依家同以前一樣咁忙，雖然社區活動係少咗，但都仲有好多組織內部嘅事務要去處理，搞到晚晚冇十點鐘都返唔到屋企。
復活節遊新界二人世界
阿星晚晚都做夜歸人，會唔會冷落咗嬌妻o架？原來太太間唔中都會詐型，不過阿星都好識做，好似嚟緊嘅復活節咁，佢就話想好似往年一樣，帶老婆去個短途旅行。不過今年因疫情關係，好多國家都實施入境限制，睇怕都無辦法離開香港喇，阿星就惟有打算喺新界東一帶捐窿捐罅，搵吓啲隱世地方，當係拍吓拖、享受二人世界咁話。