政情：千億基建 港珠澳大橋流量從未達標
耗資千億港元嘅港珠澳大橋開通至今已經一年半，但車輛流量至今從未達標。運輸及房屋局就話，由舊年十月至十二月，大橋每日平均車流只有三千九百二十架次。即使今年一月至二月因疫情影響而有二十九日免費通行，每日嘅平均車流仍然跌至二千五百七十架次，其中私家車跌至每日只有一千六百三十架次。上述數據已計算大橋每日平均進出香港的私家車、穿梭巴士、跨境巴士及貨車流量。
免費通行都冇用
運輸及房屋局尋日以書面回應議員就財務委員會特別會議提出嘅質詢，指根據政府最初為大橋撰寫嘅可行性研究報告，指大橋通車初期嘅車流量估計為每日九千二百至一萬四千架次。而大橋喺一八年十月通車至舊年十月，每日平均車流為四千零九十架次，顯示大橋開通至今嘅汽車流量從未達標，連當年嘅最低估算都未達到喎。