政情:回收廚餘唔夠數 黃錦星諉過於菌

新冠肺炎疫情持續,為咗減少傳播風險,政府頒布各項社交戒嚴措施,市民都因此少咗出街食飯,理應廚餘量都會相對減少。有議員就批評,政府喺上年度收集到嘅廚餘比當初承諾嘅每年可收集量七點三萬公噸少一半。點知環境局局長黃錦星竟然將唔達標嘅原因賴落啲菌度喎,究竟係啲菌嘅錯定係政府辦事不力呢?

環境局日前回覆立法會特別財委會議員質詢時提到,有機資源回收中心第一期已經喺二○一八年開始運作,每年可以處理七點三萬公噸嘅廚餘,而第二期嘅設計及建造同營運合約已經喺舊年八月批出,設施預計喺二○二二年開始運作,每年可以處理大約十一萬公噸嘅廚餘添。

之不過可以處理到十一萬公噸咁龐大嘅廚餘又有咩用呢?政府依家收集到嘅廚餘根本連本身嘅七點三萬公噸都唔達標。議員陳志全尋日喺立法會財務委員會嘅特別會議上批評,喺二○一九至二○二○年度,政府有機資源回收中心第一期只係收集到大約三萬公噸嘅廚餘,同政府當初承諾嘅每年可以收集嘅七點三萬公噸少成一半咁多。陳志全擔心,喺政府限制堂食嘅措施之下,會令廚餘回收量進一步減少,要求政府回應有關嘅問題。

環境局局長黃錦星就解釋,由於喺廚餘處理技術上需要有種菌嘅過程,而養菌過程需時,「唔會第一日就處理到」,需要逐步處理嘅,所以廚餘收集量仲未達七點三萬公噸嘅最高水平。環境保護署副署長郭黃穎琦就補充,舊年有機資源回收中心每日收集一百公噸嘅廚餘,承認今年頭幾個月的確有受疫情影響,收集量因而輕微減少,但又冇話畀議員知確實減少嘅數目喎。舊年廚餘量已經唔達標,今年疫情底下一定會更加少,但政府話二○二○至二○二一年度,有機資源回收中心第一期嘅預算營運開支係五千五百萬港元。

批發市場唔夠桶 源頭收集冇做好

不過政府回收廚餘不力都唔係第一日嘅事,之前就有每日產生大量廚餘嘅食品批發市場,場內回收桶數量不足,廚餘被棄於垃圾桶,甚至有批發市場嘅當眼處都見唔到回收桶,周地都係垃圾。連源頭收集都做唔好,就算啲菌種得幾快都好,都收唔足廚餘喇!

第一手消息請下載on.cc東網iPhone/iPad/Android/Windows Phone Apps