中環出更：黑暴毀逾千垃圾桶 耗百萬公帑重置
由舊年六月反修例示威開始，示威者大肆破壞街上嘅公共設施，就連垃圾桶都不能幸免，成日都畀示威者當路障用，甚至放火焚毀。食物及衞生局日前回應立法會議員質詢時透露，由舊年六月至今年二月期間，食物環境衞生署有成一千二百八十一個垃圾桶、廢屑箱，同埋一百一十八個回收箱受到破壞，要花費一百六十萬港元嚟重置。
食衞局話，灣仔區被破壞嘅垃圾桶最多，佔一百四十一個；其次係油尖旺、黃大仙同埋元朗區，有一百三十至一百三十八個不等。損毀嘅回收箱數目都係灣仔區最多，有四十三個。
食衞局又話，基於公眾安全理由，曾於集會同遊行示威期間，暫時移走有關地點嘅廢屑箱同回收箱，其後再因應情況陸續擺番原位。但對於一啲成日發生示威嘅地點，當局就會繼續擺放臨時垃圾袋。
已剷近三百處連儂牆
至於喺示威期間各區成日出現嘅「連儂牆」，食衞局話由舊年六月到今年二月尾，相關部門總共採取咗大約九百五十次聯合行動，喺全港各區合共清理咗二百九十五個未經許可展示或張貼招貼嘅地點。至於喺舊年六月至十二月，食環署針對未經准許而展示招貼或海報個案而發出嘅定額罰款通知書數目有二千宗，觀塘區佔最多，有四百四十七宗，其次係元朗區，有二百二十八宗。
另外，運輸及房屋局都透露，由舊年六月到依家，有四十三宗涉及交通燈故障嘅交通意外，導致八十二人受到輕傷。
卓妮