中環出更：疫情未受控 鄭重科：十月先游得龍舟水
過往扒完龍舟，意味盛夏已經到臨。不過今年比較特殊，可能要去到秋天，至有得游龍舟水。舊年奪得佳績嘅香港菁英會龍舟隊，今年報名參加赤柱舉行嘅龍舟競賽。不過菁英會副主席鄭重科話，佢哋嘅健兒可能要去到十月，先至同其他龍舟隊伍一較高下。
鄭重科話主辦單位考慮到疫情未必喺短期內受控，因此打算除端午節外，於十月另辦一場賽事，為已報名嘅隊伍提供另一選擇。而菁英會原初嘅打算，係參與端午節龍舟競賽前，要先完成十六課操練。佢哋於是由二月中開始，每星期集訓一次。然而進行過四課集訓之後，驚覺另一波疫情來勢洶洶，惟有喺上月中旬暫停操練。佢話縱使疫情於端午節前結束，但集訓次數太少不足以應付賽事，所以都係留待十月較好，但若果疫情去到暑假仍未受控的話，咁就難講啦！
魏華星清晨練跑避人
儘管未知何時復操，不過佢會建議隊員，居家鍛煉心肺或進行阻力訓練並將過程拍下，主席曾鳳珠睇過片段之後就會送小禮物鼓勵。
社企「全城街馬」創辦人魏華星指半年前，好多長跑賽事都難以如期舉行，而近日就連集體練跑都乏人參與，對相關社企同教練嘅收入，構成莫大衝擊。儘管目前宜於居家避疫，不過佢認為每星期至少要練跑一次。為減低風險，佢主張喺人流疏落嘅清晨時分練跑，若嫌戴口罩練跑會妨礙呼吸，唔戴口罩又有顧慮的話，使用圍巾就成為折衷之舉。而閒來逗留家中，都要勤做拉筋同伸展動作。
酷愛單車運動嘅香港中華廠商聯合會常務會董沈運龍，就話單車愛好者就算集體活動，都會保持距離，加上路線又以郊外居多，論中招嘅風險應該較低，不過為遵守社交戒嚴令，好多單車群組嘅活動紛紛告吹，就算有人響應復活節期間到西貢集體踩單車，都將會分拆為三至四人一組，以符合法例要求。
卓妮