政情：八網難逃：陳沛然「疫中作樂」自製乒乓枱畀囡囡
最近大家都因為疫情關係留在家中，咁長時間各自都會諗盡方法去打發時間。本身係醫生嘅醫學界議員陳沛然（Pierre）尋日就喺Facebook上載咗張乒乓枱相。認真睇，呢張唔係普通嘅乒乓枱，係Pierre用屋企道具自製o架！
餐枱擺紙包飲品當分界線
Pierre喺屋企餐枱中間擺上紙包飲品當分界線，就可以打乒乓波啦！大家都知Pierre有三個女，唔知係咪擔心近期囡囡們留喺屋企太悶，又適逢尋日係兒童節，Pierre就親自動手整乒乓枱畀佢哋玩呢？
貼文一出，好多網友都似乎有同感，話自己以前細個都係咁樣喺家中作樂，可以一家大細輪住玩，有網友都分享自己一家四口打BB羽毛球，一個做禮物小姐，一個做裁判，仲話似曾相識，仲話○三年沙士時期都係乒乓度日咁話。