政情：被問初戀係幾時 何俊賢差啲要跪榴槤
最近有唔少建制派人士都開拓緊網絡市場，大開網台節目，爭住做KOL咁話喎。漁農界議員何俊賢（高佬賢）前日就上咗一個網台節目，仲大玩依家好流行嘅「快問快答」遊戲。之但係，主持人問嘅問題梗係唔會咁容易就畀高佬賢過到關，其中一條問題仲差啲搞到佢要跪榴槤添！到底係乜嘢問題呢？
話說當時主持人問：「你初戀係幾多歲？」高佬賢一聽到就知係陷阱嚟，隨即九秒九答話係「一出世嗰陣時」，仲話「我一定好愛我阿媽喇」。
「講幾多歲咪實畀老婆鬧」
咦！睇嚟都唔係咁真心咋喎。高佬賢就補充，話自己咁答「（實）無死o架嘛」，仲話「我講幾多歲咪實畀我老婆鬧！」睇嚟高佬賢平時都有玩開社交網站，知道激嬲老婆可以有十萬個理由！
不過，主持人就梗係唔會咁輕易放過高佬賢，緊接問佢：「老婆同阿媽跌落海，你會救邊個？」面對呢條經典難題，高佬賢就答話：「我唔會畀呢件事發生。」睇到呢個答案就知高佬賢訓練有素喇！