政情：黑仔王林琳 未出關再閉關

話說前排林琳去完瑞士返嚟要接受十四日家居檢疫，佢尋日喺Facebook發貼，話原本諗住乖乖地喺屋企閉關十四日後，就可以出關食Omakase（無菜單料理）做facial（面部美容療程），點知竟然喺就嚟出關前五個鐘頭，唔小心差錯腳碌落樓梯，搞到要繼續在家休養。

同貓鬥快落樓梯 扭傷右腳

聽林琳講，原來佢呢排閉關喺屋企有多咗煮飯，加上近期天氣變，有風濕痛嘅老公前日就腳痛到落唔到樓食飯，咁林琳就攞上樓畀佢食喇，點知落樓時佢同隻愛貓玩「鬥快落樓梯」就出事喇，喺樓梯轉角位唔小心差錯腳碌落樓梯扭到右腳，痛到佢標眼水啊，陰功！

依家林琳食好嘢同扮靚嘅打算就全盤推翻晒喇，尋日朝早出關第一件事變咗睇跌打，之後仲要日日返去搵師傅捽腳，「諗起都痛到叫救命啊」。至於之後點解決一日三餐？林琳就話都係靠朋友街坊接濟，幫佢哋送食材啦！