中環出更：陳淑莊酒吧「開會」 何啟明寸「點對得住醫護」
有網民見到公民黨陳淑莊（Tanya）日前帶住四十人，趕喺酒吧關閉前到深水埗一間酒吧「夜蒲」，Tanya事後聲稱話係開會。另一名議員何啟明尋日就拍片寸爆Tanya，仲剪咗Tanya早幾日喺工務小組委員會開會時嘅發言片段，鬧爆佢點對得住醫護喎！
何啟明喺Facebook（Fb）上載咗段片段，標題係「明寸陳淑莊」，仲剪咗Tanya早前開會時發言嘅重頭戲一分二十秒。當日工務小組委員會主席盧偉國喺疫情下繼續開會，審議港鐵沙中線工程追加嘅約八十七億元撥款，Tanya發言鬧爆運輸及房屋局局長陳帆，話呢啲時候仲要開會點對得住啲醫護，又講話醫護叫大家Stay home，叫全部香港盡量Stay home，話香港醫院冇爆發疫情係萬幸，但社區源頭根本有啲係揾唔到等，不斷質疑點解要咁逼開會呢？
學陳淑莊鬧官員說話
跟住何啟明即刻學Tanya呢段說話，鬧番Tanya禁酒令推行兩個星期，依家先一日咋，一日都忍唔到，質問佢飲酒係咪咁緊要啫，點解要咁逼咁急喎，叫佢畀個理由畀全港市民，又問佢點對得住啲醫護，仲話呢個世界有樣嘢叫視像會議！擺明係寸Tanya自打嘴巴喇！
另一議員麥美娟都喺Fb寸爆Tanya，話Tanya以議員身份去酒吧開會，麥都可以開住會去食麻辣火鍋喎，仲講笑話陳議員咁樣講，陳局長唔該講兩句。唔知食物及衞生局局長陳肇始會唔會回應呢？
卓妮