政情：公園掛直幡 飆至去年22宗 漁署5年僅兩檢控成功
近年不時有市民喺郊野公園展示大型直幡表達政治訴求，情況喺反修例風波爆發後更趨常見。漁農自然護理署回覆漁農界議員何俊賢書面質詢時透露，舊年有廿二宗喺郊野公園非法展示大型直幡嘅個案，比一五至一八年期間每年只有三至四宗大幅增加，政府部門用喺處理相關個案嘅人手同時間大幅上升。
維修交通燈 燒四千萬
漁護署強調，現時有一百五十五名公務員負責在全港郊野公園進行日常巡邏及執法工作，而過去五年署方成功檢控兩宗喺郊野公園非法展示條幅嘅個案，罰款額分別為五百元同七百元。該署亦曾對其他個案作出調查，惟調查後均未能搵到涉事人，故未能採取進一步行動。
另外，喺反修例暴力示威期間，大量路面設施被毀。路政署話喺一九至二○年二月期間，共有七百四十組交通燈遭受破壞，截至二月底，所有被破壞嘅交通燈大體上恢復運作，相關維修費用約為四千萬元。署方又話約有五十五公里欄杆同約二萬二千平方米行人路路磚被拆走，一千四百六十三個安全島標柱同八十七個交通標誌被破壞，由於復修工作仍在進行，最終開支仍有待結算，但估計開支約為二千八百萬元。