政情：拉布阻內會財會選主席 嘥近千萬
自去年十月本立法年度復會至今，內務委員會因泛民拉布而一直未選到正、副主席。根據秘書處尋日就財政預算案回覆財務委員會資料顯示，喺一九/二○年度截至上月十日，內委會開咗十二次會，時數為二十三小時五十二分鐘，花費逾六百八十七萬元。至於財委會選正副主席就開咗四次會，時數為十三小時二十分鐘，花費逾二百八十四萬元。換言之，拖延內會同財委會選正副主席，嘥咗近一千萬元。
議員過往喺財委會、轄下嘅工務小組委員會同人事編制小組委員會上，亦會提出中止/休會待續議案，喺一八/一九年度，三個會議處理中止/休會待續議案所花嘅時間合共六小時四十七分鐘，當中財委會就用咗四小時三十分鐘處理，工務小組委員會就用咗兩小時十七分鐘，合共花費約一百八十三萬元。
處理中止待續議案 耗近三句鐘
而喺一七/一八年度，三個會議處理中止/休會待續議案合共用咗兩小時五十三分鐘，花費超過六十四萬元。喺一九/二○年度截至二○年二月，三個會議合共用咗兩小時三十一分鐘，當中財委會佔一小時五十七分鐘，工務小組委員會佔三十四分鐘，花費逾七十二萬元。