政情：回應CSI口罩去向 審計署拒講明 申訴署話冇攞過
市面一罩難求，但唔少傳媒同市民指有由懲教署生產的口罩（CSI口罩）流出市面，令人質疑有人涉嫌挪用或轉售CSI口罩。申訴專員公署早前宣布將主動調查，有關CSI口罩在生產、分發和點存方面的安排。公署近日回覆議員質詢時澄清，過去三年公署並無接收CSI口罩，而審計署就冇講明接收CSI口罩嘅情況。
強調冇向其他機構賣防護裝備
公署話喺過去三個年度冇從政府物流服務署獲得CSI口罩。根據當局提供嘅數字，公署喺一九/二○年度喺物流署獲得各十件全身防護衣、面罩同護目鏡，總值六百四十多元。口罩方面，公署喺一九/二○年度則自行採購外科口罩三萬零五百個，涉及費用約十七萬元。
同一項質詢，審計署就話政府嘅口罩採購工作正面對激烈競爭，因此政府認為現階段，不宜公開披露更多個別部門嘅個人防護裝備喺過去數年同近期嘅庫存、來源地、有關供應商嘅資料、購買量同金額等具體資料，以免損害政府物流署同各部門採購個人防護裝備嘅議價能力，審計署又強調並冇向其他機構供應或售賣任何個人防護裝備。