政情：工會炮轟 失業率飆懶援手 羅致光最應炒魷

鄧家彪麥美娟斥智商高能力低

鄧家彪尋日再次邀請麥美娟一齊拍片，叫網民一齊競猜究竟邊個局長要失業，咁當然唔係有個局長真係要畀人炒啦，但係鄧同麥都覺得嗰位局長乜都冇做過，理應要畀人炒囉！麥喺影片入面話，依家好多打工仔都開工不足，有職業司機一日淨係接得一單工作，要面臨失業。打工仔失業就梗係淒涼啦，但明明智商高達一百六十，但又好唔稱職嘅局長就最應該失業！

哇，智商高達一百六十仲唔係講緊羅致光？鄧形容羅致光一直搬龍門，推出嘅支援業界措施非常虛無，講到天花龍鳳，其實就乜都冇。鄧批評政府早前推出嘅十項民生措施離晒地，而羅亦一直唔肯推出失業援助金，仲話世界上並冇失業援助金係唔需要供款、入息或者資產審查，政府當前急務係支援低收入家庭，反指援助金遠水不能救近火添。麥美娟就寸羅致光身為學者，智商又高，政府一直以嚟出現嘅技術問題應該可以解決晒，反問羅為勞工做過啲咩喎。

補助未保障打工仔 促政府堵漏

由上年嘅反修例事件開始，再去到依家疫情肆虐，政府推出咗幾輪嘅「撐企業，保就業」措施支援業界，不過麥就提出，撐企業並唔等如保就業。麥指，即使政府撥款支援食肆、零售業同旅行社等中小企，都可能淨係補貼到企業嘅租金，員工仍然收入不足。麥舉例有啲酒樓嘅侍應會去幾間餐廳做炒散，所以淨係補貼舖頭並唔可以真正幫到工友。

麥指佢哋工聯會日前同政府高層會面，反映業界嘅苦況，希望政府可以推出直接幫到打工仔嘅措施，好似失業援助金咁。不過，麥話政府高層好似對支援業界嘅具體內容唔係好清楚，令人懷疑有官員冇好好同政府高層反映問題，即係失職唔做嘢喇！

鄧家彪最後就呼籲無論議員定高官都要做好本分，唔好講埋啲唔負責任嘅說話。鄧又話依家疫情搞到香港百業蕭條，政府就更加要謙虛聆聽業界嘅聲音，同市民一齊共度時艱o架嘛。