中環出更：林鄭年賺521萬自肥 市民勒緊肚皮
特首辦回應議員有關財政預算案書面質詢時透露，喺二○二○至二一年度，特首林鄭月娥嘅薪金預算開支高達五百二十一萬元，另外又有非實報實銷酬酢津貼約九十八萬港元用以支付於官邸舉行嘅公務款待開支。此外，特首辦亦預留六十三萬元用於舉行各類型接觸各界人士及訪客嘅公務款待活動，以及二百零九萬元用於支付行政長官及隨行人員嘅公務外訪開支。有議員批評林鄭尸位素餐，施政失敗仍支取「肥到着唔到襪」嘅巨額人工，反而市民就要「勒緊褲頭」。
被指死不封關 累百業受難
議員楊岳橋尋日大數林鄭嘅「政績」，包括被評級機構調低本港信貸評級、香港失落全球最自由經濟體地位。楊又批評，林鄭處理肺炎疫情時見步行步，死不封關，導致疫情擴散百業蕭條，巿民大眾都要過苦日子，楊批評佢無視市民正處於水深火熱之中。
儘管行政長官於二月底，曾聯同所有政治任命官員向慈善機構捐出一個月人工。不過議員容海恩關注林鄭會否自願減薪，以展示佢同市民共度時艱嘅決心。特首辦未有正面回應，只話往後情況若繼續轉差，問責團隊會適時作出回應。
此外，有議員關注去年九月林鄭喺灣仔伊利沙伯體育館舉行一場「社區對話」嘅開支同成效。特首辦就指相關活動開支約為四十三萬二千港元，死撐能夠加深對彼此立場嘅了解。政府又話礙於種種原因而未能舉行第二次「社區對話」，但指出未來仍會繼續積極通過其他形式聆聽市民意見咁話喎。
卓妮