中環出更：龐愛蘭口罩旗袍襯到絕 抗疫裝冇得輸
講究裝扮嘅女士不但唔想遇到「撞衫」嘅場面，就算係小小一片口罩，亦要與眾不同。香港藥學會會長龐愛蘭（Scarlett），早前佢喺社交網站上載一張近照，可見佢臉上嘅口罩，同身穿嘅旗袍襯到絕。如此吸睛嘅配搭，回頭率肯定超高啦。
Scarlett話相中嘅旗袍並非新衫，但由於同佢相熟嘅其中一位裁縫師傅，向來都有保留剩布嘅習慣，早前鑑於疫情肆虐於是就幫佢縫製一個口罩套，而第二個亦快將完工，預計過兩日就有另一款「龐身之寶」到手。至於布料，就係前年佢喺葡萄牙以五歐元購入，真係抵到爛平到笑。Scarlett又自爆，佢出門遠行例必逛當地嘅布匹店，物色別具風格嘅布料然後帶返香港交畀裁縫師傅，他日撞衫嘅機會就微乎其微。講番佢個口罩套，Scarlett話棉質布料不但佩戴舒適，可換濾片嘅設計更便於清洗，相較一次性嘅外科口罩，無疑係較為環保。不過無論點都好，Scarlett呼籲大家為人為己，每當離開家居範圍，都應該佩戴口罩。佢話捷克目前嘅染疫人數之所以遠低於歐洲諸國，都係有賴當地人嘅衞生防護意識好高，不論健康狀況如何都必定戴好口罩先至踏出家門。
文化力量秘書長伍婉婷（Yolanda），咁啱佢同Scarlett都係幫襯同一個裁縫師傅，因此佢個口罩套，顏色風格都同佢件旗袍都相當脗合。除此之外，好多老友都知道佢向來鍾情於紫色，因此但凡發現有紫色口罩賣，都必定為佢預留一份。由於不時有朋友送上紫色口罩，Yolanda就將早前自己購得嘅其他顏色口罩，轉贈畀有需要人士。
善用剩布 陳淑芝為囡囡縫口罩套
愛美係女士嘅天性，就算係小妹妹，疫情下嘅裝扮都唔可以求其屋o架。紫荊青年商會長遠展委員會主席陳淑芝（Cammie），就利用剩布為自己同囡囡，縫製同衣着匹配嘅口罩套。倘欠缺用適合配搭嘅剩布，就嘗試以顏料喺布面繪畫圖案。Cammie話若果由此形成一股時尚的話，都可算係時裝潮流嘅一項創舉。
卓妮