政情：蒸口罩被瘀爆 蔣麗芸唔死心拉美國落水
新冠肺炎疫情持續，口罩等抗疫物資仍然唔夠。議員蔣麗芸（Ann）早前提議市民可以一百度高溫蒸氣消毒口罩嚟重用，畀醫護同專家反駁無科學常識。不過，阿Ann對自己嘅「清蒸口罩」非常堅持，尋日仲引述外國嘅例子，指連美國都有將口罩消毒再重用喎。
阿Ann尋日喺社交平台貼文，轉發咗篇新聞，指面對口罩短缺，就連美國食品及藥物管理局（FDA）都緊急授權一間公司，開發新系統對用過嘅口罩消毒，清除當中嘅生物污染物，包括新冠病毒。而嗰間公司會將口罩暴露喺濃縮嘅過氧化氫兩個半小時。嗰間公司話可以多次消毒口罩或者防毒面具，唔會降低性能，目前消毒系統每日可以清潔八萬個口罩。
美研過氧化氫 蔣倡家用蒸鍋
不過，美國嗰間公司係用過氧化氫消毒，阿Ann當時就建議喺家中用蒸鍋蒸口罩，好似爭得有啲遠喎。阿Ann仲話：「窮則變，變則通，在不夠口罩的日子裏，消毒重用是絕對可行！」睇嚟就算蒸口罩事件點畀人瘀爆都好，佢仍然係死心不息。