政情：隨疫變通 特別財會攝到期
自從「社交戒嚴令」生效之後，好多社交活動都取消咗，連部分記者會都唔開放採訪，改為網上直播。立法會財務委員會尋日亦宣布，原定喺四月三號召開嘅特別財會，改為七號上晝舉行。唔通又喺疫情累事？
連開4日會 處理預算案質詢
呢個負責審議最新一份財政預算案嘅特別財會，雖然各行各業同全港市民都等緊份預算案救命，但班議員好「盡責」，都提交咗成六千八百幾條書面問題質詢，財委會主席陳健波（波哥）之前就預留咗四月三號下晝、六號全日、七號下晝，而八至九號就全日，分開咗五日嚟審議，實際前後夾埋都係四日時間。
咁依家特別財會改期會唔會阻到市民攞到「救命錢」(口架)？波哥就解畫，指如無意外，特別財會都預計喺九號完成。而今次改期，只係咁啱因為原定七號上晝舉行嘅「新屋嶺議員視察團」因疫情關係取消，咁波哥就諗住將三號會議攝返入嚟，一氣呵成連續四日處理會議。佢又預計政府會先書面回覆首三千條書面質詢，之後就會進行口頭質詢。