政情：止暴抗疫獻策不力 行會成員民望低到極
舊年反修例風波到今年新冠肺炎疫情，唔單止政府高官民望屢創新低，連帶被視為「內閣」嘅行政會議成員同失民心。最新民調結果顯示，五大認知度最高嘅行會非官守成員評分齊創新低，葉國謙排尾二，湯家驊就包尾，可見市民對佢哋嘅表現係相當之不滿，而有工會就批評行會成員防疫獻策不力，政府不斷出現「公關災難」。
香港民意研究所喺上月十七至十八日、十九至二十日，分階段隨機抽樣電話訪問咗約一千名十八歲或以上香港居民，先了解佢哋對行政會議成員嘅熟悉程度，較高嘅六位再進入第二階段讓市民評分。調查結果發現，對比半年前，按市民熟悉度排名，分別係葉劉淑儀、陳智思、湯家驊、林正財，其次係張宇人同葉國謙，當中林正財同葉國謙取代咗羅范椒芬同任志剛。
獲得提名次數最多嘅六議員就進入下一階段評分調查。以零至一百分評分，陳智思嘅評分最高，有三十一點一分，但都比舊年九月調查嘅三十五點一分下降，亦都係佢自○五年一月以嚟嘅新低；其餘四位成員全部都低過三十分，包括葉劉淑儀得二十九點五分、張宇人二十四點七分、尾二係葉國謙二十四點六分，包尾嘅湯家驊僅得二十四點二分，五人全部都創其個人新低！而林正財雖然有二十八點八分，但由於認知率低而被剔除。
被指自說自話 公關災難
香港公關及傳訊業總工會理事陳嘉晴就分析話，對一眾行會成員評分創新低完全唔覺得意外，又話政府冇任何公關技巧可言，導致一次又一次出現公關災難。佢認為良好嘅公共關係係需要與大眾建立真誠互信，成日淨係單方面傳遞訊息，而無雙方互動，舉例話好似早前嘅對話會，由原本計劃嘅幾場變為一場，自說自話、無雙向及長期嘅溝通，令一眾市民覺得好失望！又例如早前醫護罷工要求全面封關等，政府亦完全無聆聽同修正政策。
老實講，外界炮轟政府抗疫慢十幾拍，採取嘅措施又被狠批冇用，好似禁酒令咁，畀業界鬧爆之後，最後冇實施，仲要推說話當日只係建議啫！究竟呢班行會成員畀咗啲乜嘢橋政府？唔通就係叫政府試水溫同出口術？