中環出更:以為計錯出關日 葉劉差啲「心臟停頓」

早前因急事前往珠海,依家正接受家居隔離嘅行政會議成員兼議員葉劉淑儀即將完成十四日隔離令,佢話今日就可以「出關」自由活動,但就被質疑計錯日子,應該係聽日先啱,聽完嚇到佢差啲心臟停頓添!

話似曾國衞咁驚險

葉劉喺社交平台貼文,話新民黨行政總裁曾質疑佢「出關」嘅日子,既然隔離令係十四日,理論上應該要到四月二號先可以自由活動。葉劉話聽完之後成個人嚇親,情況就好似入境處處長曾國衞曾喺訪問入面話「嚇咗我一大跳,差啲心臟停頓」咁。

雖然只係相差一日,但困咗咁耐梗係想快啲「重獲自由」,所以葉劉即時檢查衞生署發出嘅強制隔離令,文件上清楚列明強制隔離期係尋晚十一點五十九分結束,亦向當日一齊到珠海嘅司機查詢強制檢疫令資料,發現隔離令結束日期同時間相同,即係佢哋今日就可以自由活動,一齊返工喇!

曾國衞早前隨包機到日本,接載滯留喺郵輪鑽石公主號嘅港人返港。葉劉話對方需要面對重重波折,例如其中一個曾經同多個同事近距離接觸嘅人,一度被以為確診新冠肺炎,所以曾國衞先話「嚇咗我一大跳,差啲心臟停頓」。

卓妮

第一手消息請下載on.cc東網iPhone/iPad/Android/Windows Phone Apps