中環出更：工廈天台魚菜共生 潘嘉麗推動綠色生活
憑藉現代科技，就算喺石屎森林栽瓜種菜，養殖池魚嘅農耕生活，亦唔係冇可能。近來就有一間名為「綠悠天」嘅社企，以「魚菜共生」呢種低投入同低污染嘅環保方式，喺工廈天台出產食用魚及蔬菜，又培訓自閉症青年參與城市農耕，推動綠色生活。
到底乜嘢係「魚菜共生」呢？社企創辦人潘嘉麗（Kitty）解釋，話佢哋係結合養魚同種菜嘅食物生產系統，利用微生物分解魚嘅排泄物以轉化為養分，植物吸取之後同時過濾水質，池魚就會喺乾淨嘅環境中成長。由於整個生態循環容不下化學物質，所以魚菜共生係一種有機食物嘅生產方式。Kitty又指魚菜共生嘅日常運作，只係監察水質、按時餵魚同防止蟲害，同傳統農業須墾田闢土、揮汗耕耘嘅刻苦勞動比較，無疑係輕鬆得多，就算係自閉症人士亦可駕馭，並藉此掌握相關嘅謀生技能，融入社會。
雖然操作簡易，但要喺天台架設魚菜共生系統就絕不簡單喇！Kitty嘅哥哥潘學新（Louis）就喺舊年夏天，將佢過往喺夏威夷學得嘅魚菜共生技術，應用喺柴灣某工廈天台。雖有言：子非魚，焉知魚之樂，但一講到養魚，Louis就好清楚魚嘅習性，就係怕見人，所以魚菜共生系統所養殖嘅魚，係要活喺不見光嘅魚缸裏面o架！
洪文正想試吓迷你版
半島東扶輪社創會社長洪文正（Alex），日前就同社員陳玉安、國際唎酒師鄭佩珊、獨立經銷顧問陳少敏，聯袂到綠悠天品嘗來自魚菜共生嘅菜餚。Alex話留意到購物網站，有花盆同魚缸二合一嘅產品出售，而佢就有意添置以試一試迷你版本嘅魚菜共生，咁就可以飼養觀賞魚之餘，又順便種植辣椒，以滿足自己嗜辣嘅味蕾。但點樣管理先達致最大效益，就要向Louis呢位魚菜共生嘅專家請教喇！
卓妮