政情：陳欽勉年半坐正房協行政總裁
房屋問題向來係燙手山芋，有房屋實驗室之稱嘅房協近年亦接受唔少新任務。房協尋日宣布，現任副行政總裁陳欽勉將由聽日起，升任行政總裁兼執行總幹事，接替已經喺房協服務近廿六年、即將退休嘅黃傑龍。陳喺一八年十二月加入房協出任副行政總裁，短短一年半已火箭式坐正。
明起接替黃傑龍
有消息指房協其實早有盤算，因黃傑龍對落多位總監近年陸續退休，所以房協一早外聘接班人，搵陳擔任副手，等佢熟悉房協運作後，就正式接任，以圖順利交接。
講番陳欽勉背景，佢加入房協之前，曾擔任保良局行政總監六年，亦喺香港政府政務職系服務二十年，並於多個政策局及部門擔任首長級職位，包括商務及經濟發展局、民政事務總署及政務司司長辦公室行政署，相信政府同埋非牟利機構嘅運作佢都非常熟悉。
消息公布後，陳亦指喺依家充滿挑戰嘅時刻接任，既感榮幸又覺任重道遠。未來五至十年係房協建屋高峰期，重建舊屋邨、興建資助出售房屋、發展專用安置屋邨等，將會係房協嘅業務重點，而面對人口老化，房協會繼續發展以居家安老為目標嘅項目及服務，又多謝黃傑龍帶領房協奠下良好基礎。