政情：在家避炎工作不變 徐英偉隔空與鄭泳舜開會
社交戒嚴令之下，市民唔可以多於四個人聚集，就連今個星期嘅立法會大會同埋工務小組委員會都取消埋。喺公務員都要居家工作嘅情況下，勞工及福利局副局長徐英偉都唔敢見議員喇，但係工作又無得停，徐英偉尋日就惟有同議員鄭泳舜開視像會議喇。
外傭放假喺屋企休息
本來徐英偉同鄭泳舜今日有個會晤，但就因為疫情關係改為視像會議。鄭泳舜主要針對第二輪防疫抗疫基金，可以點樣支援打工仔同埋失業人士提出建議。例如要求倣效英國、新加坡等地方，推出非常時期嘅全方位資助計劃，包括「逆境失業援助金」，支援失業同開工不足同放無薪假嘅市民，仲有支援企業支付僱員薪酬。
另外，家庭外籍傭工都要遵守新規例，所以政府都建議佢哋，放假日都盡量唔好出街聚會喇！徐英偉就話佢屋企嘅外傭姐姐休假日都留喺屋企，不過姐姐留喺屋企唔代表可以要求姐姐做嘢o架嘛，徐尋日喺社交媒體發布咗張洗碗嘅相，話佢同佢嘅小朋友喺姐姐嘅休假日負責清潔同埋煮嘢食，佢仲話要多謝姐姐咁喎。