政情：「戒嚴」生效 少人返工 立會餐廳冷清清
政府上周五（27日）公布新一輪抗疫措施，當中包括公眾地方限制四人以上聚集嘅「社交戒嚴令」。呢個戒嚴令喺上周六（28日）傍晚六點已經生效，不過立法會就係獲豁免嘅場合之一，所以喺會內嘅餐廳今日都有照常營業，惟餐廳職員話由於冇乜人返工，午市人流明顯減少。
告示倡外賣自取
因應「社交戒嚴令」，餐廳就喺門口當眼處貼出告示，話即日起會實施座位數目減半、每枱最多坐四人、餐桌間保持最少一點五米距離等食肆新規定。現場所見，餐廳員工喺餐枱上擺放提示牌，方便食客知道邊張枱可以用。驟眼望落去，可供食客使用嘅餐枱真係唔多，而且人流稀疏，所以餐廳都有張貼告示，建議客人盡可能使用外賣自取服務。
除此之外，餐廳亦有於可供用膳嘅餐枱上擺放「抗疫提示」紙牌，提醒客人用餐時少說話、而非用餐時要戴口罩等溫馨提示。