政情：吳思諾自爆拒續任青發會
政府話要聽到青年人嘅意見，於是喺前年將青年事務委員會升格做青年發展委員會，政府尋日公布新一屆青發會委員名單，離任嘅委員包括有前新聞主播盤翠瑩同民主黨嘅大律師吳思諾。吳思諾自爆拒絕續任，又批評政府唔聽意見，就連建制派委員提出嘅意見都唔接受。
我哋向吳思諾查詢，佢話政府有再邀請佢續任青發會委員，但佢主動拒絕。佢批評委員會嘅委員唔係由民選產生，開會議程都係由政府秘書處提出，委員冇乜機會提出，而最重要係舊年六月修例風波發生後，佢試過同委員會主席、政務司司長張建宗轉達年輕人嘅聲音，要求政府回應五大訴求，就算有建制派委員反映同樣嘅意見，但當局都冇處理問題。
新一屆有八個新委員
新一屆委員會當中有八個新委員，包括係寧夏回族自治區常委嘅彭穎生、曾喺工聯會做過五年義工嘅藍家達、科研界代表林華盛同中學教師顏雋，另外四位分別係莫芷茵、林恩言、李貴霞同李雪兒。新一屆青發會嘅任期喺四月一日生效，為期兩年。