政情：下屆冇得留低 陳淑莊起勢咁問 邵家臻慳番口水

預算案議員提6804項質詢

上年度議員共向政府提出七千二百三十六條Q，雖然本年議員問Q較上年少約百分之六，但仲有六千八百零四條。而問得最多嘢嘅頭四位議員都係「常客」嚟，喺前兩年都係提出最多Q嘅議員，今年亦都冇意外，四個人加埋問咗逾二千三百條Q、佔所有議員提問嘅三分一添！而其中問得最多Q嘅係工黨議員張超雄，提出超過九百條Q。排第二嘅係公文袋議員郭家麒都提出六百七十二條Q喎。

而問Q數目分別排行第三同第四嘅陳淑莊同邵家臻，喺去年被裁定煽惑他人犯公眾妨擾罪及煽惑他人煽惑公眾妨擾罪成，其中陳因要切除腦腫瘤及治療，獲判緩刑兩年；邵家臻就需要服刑，並於去年十月刑滿出獄。但根據《立法會條例》第三十九條，由於兩人被判監三個月以上，定罪起計五年內都不能參選，所以就冇得參加下屆選舉啦。

而唔知陳係咪因為最後一年做議員，今次佢起勢咁問！雖然佢提出四百六十條問題，比上年多咗接近一百條，都始終追唔上黨友郭家麒。而邵家臻反而只係提出三百一十三條問題，比上年少咗一百二十四條問題。唔知邵係咪前幾年問得太多關於社福界嘅Q，覺得問無可問，所以慳番啲「口水」呢？究竟真正嘅原因係乜嘢，就只有佢哋自己知道啦！

社署收Q榜首 教局第二

身為社福界議員嘅邵家臻如果問少咗關於業界嘅Q，唔知勞工及福利局局長羅致光係咪就輕鬆咗、多得邵家臻唔少呢？又唔知係咪咁啱得咁橋，羅致光前日發網誌話今年要答嘅Q係八年嚟最少。據了解，勞工處收到約一百五十條Q；勞工及福利局收到約一百二十條Q；社會福利署收到六百八十條Q，夾夾埋埋勞福局都有近千條Q要回答。

社署收Q排榜首；而教育局較上年收少咗三十七條Q，但都有五百六十七條、穩守收Q榜第二名。而上年收Q數目「五甲不入」嘅香港警務處，今年就收到五百三十一條Q，排名第三。另外，食物及衞生局嘅衞生科就收到三百八十三條Q排第四；衞生署收到二百二十二條Q排第五。