中環出更：深居簡出忙過出街 馬丘瀚如教仔煮飯
保良局作為慈善機構，主席馬清楠自然要忙於應付派發口罩嘅活動，至於佢嘅太太馬丘瀚如，就響應醫護人員嘅呼籲，深居簡出。不過馬太話留喺屋企其實都好忙o架，唔單止要日日打理家頭細務，又由於喺英國嘅囝囝返咗嚟，咁就要兼顧教囝囝讀書嘅重任喇！
馬太話囝囝馬桂霆因英國嗰邊宣布停課，所以決定返香港避避先。不過馬太擔心囝囝匿喺屋企無所事事，只掛住打機消磨時間，惟有抽時間輔導囝囝嘅學業，加上兩個女都居家工作，屋企多咗人食飯，馬太每日都會出去買餸煮飯畀全家食。被問到依家疫情無得出街shopping，馬太就認為反正都無乜地方好去，連買新衫扮靚都唔使喇！
譚毓楨試過冇除罩就飲水
由疫情開始到依家大家幾乎一出街就要戴口罩，保良局總理譚毓楨（Jenny）就話初初戴嗰陣好唔習慣，試過唔記得除口罩就舉杯飲水，結果整濕咗件衫。好多女士都反映口罩焗到皮膚差晒，保良局副主席龐董晶怡（Helena）就話，佢同朋友會每日都試唔同嘅口罩，睇吓邊款口罩唔焗同埋唔會令皮膚敏感。Helena話最近留喺屋企時間多咗，就開始鑽研廚藝，同朋友一齊網上團購廚具，佢仲買咗個多功能煲，可以搓麵糰整蛋糕。
另一位副主席陳正欣就鍾意戴綁繩嘅口罩，因為可以調節鬆緊喎。因生意關係成日要飛歐洲嘅陳正欣，一早預料到疫情會爆發，所以農曆新年前已經去歐洲安排好一切事宜。佢喺英國嘅囡囡亦於當地政府宣布強制隔離前返到香港，並選擇留喺屋企自我隔離，算係盡一盡公民責任咁話。
卓妮