政府日前宣布嘅社交戒嚴令，波及逢周二嘅行會請願活動。因應禁止市民多於四人於公眾地方群組聚集，行政長官辦公室（特首辦）尋日表示，特首今個星期二同埋下個星期二（4月7日）都會暫停喺行政會議前接市民嘅請願信。不過想請願嘅市民仍然可以將請願信電郵或者郵寄去特首辦嘅。
至於特首喺行會前會見傳媒嘅安排，就會繼續進行，不過記者會地點將移師去地方較寬敞嘅政府總部地下演講廳。為咗控制人數同保持距離，每間傳媒機構嘅代表人數同埋座位都會有特別嘅安排，直至另行通告喎！
另外，立法會餐廳為遵守社交戒嚴令，餐廳內嘅座位數目將會減半，同提供消毒潔手液，以及要求客人佩戴口罩及通過體溫量度方可入內，而位於五樓嘅議員活動室就暫停開放。秘書處亦呼籲綜合大樓內嘅使用者進行任何活動，都要將聚集人數減至最少。