政情：羅致光嫌質詢多 議員齊轟扮委屈

答1題要$4500 羅暗寸嘥公帑

羅致光喺網誌上提到，勞福局今年需要回答九百七十七題提問，比舊年收到嘅一千三百五十題少近三成，但仍然係各政策局之首。佢舉例指，要回答一題有關安老服務嘅問題，喺草擬答覆後要先經十個官員處理，先到佢手上作最後審批。佢又重提政府早年估算要答每條問題大約要用四千五百元，暗寸班議員嘅提問使咗局方數以百萬元計嘅開支。

另外，出晒名IQ（智商）高達一百六十嘅羅致光又形容，審批問題係「溫習」政策嘅好機會，寸爆班議員問問題前唔做定功課。佢精選咗一啲有趣嘅例子，好多議員都追問上年度預算案建議嘅其中一項撥款嘅進度，但就指出財務委員會仲未通過相關撥款，仲寸爆有議員竟然問用剩咗幾多錢添！羅致光又寸班議員問嘅問題照抄往年再問一次，以為自己答緊上年嘅問題咁喎。

柯創盛斥卸責 指提問為天職

不過，羅嘅呢番言論惹嚟多名議員反擊。議員柯創盛（柯仔）指出，議員對官員提問係應有之義，又強調羅自己都做過議員，反問議員見到政府政策有唔清楚嘅地方時，唔通唔問？

柯仔又形容，羅致光IQ高到爆晒棚，就應該簡化官僚答問題嘅流程，盡量壓縮成本，而唔係將呢啲過程數晒出嚟，好似營造自己好辛苦、好委屈咁，強調喺疫情之下有好多人慘過佢。柯仔亦建議羅應該要反求諸己，唔好將啲責任推晒去議員同市民一方，仲提醒佢制訂政策時要貼地啲咁話喎！

尹兆堅笑露底 反映官僚主義

羅嘅前黨友、議員尹兆堅（肥尹）就強調，作為官員責備議員問問題唔恰當，羅致光自己都做過議員，唔應該怕面對質詢。肥尹笑羅喺網誌中唔小心「露底」，話畀市民知政府有幾咁官僚，即使答一條簡單問題都要經十幾個官員處理。肥尹又話，唔排除有同事重複提問係為咗增加政府行政成本，但強調官員喺部分議題上長期都回應唔到議員質詢，作為議員當然要問到有答案為止喇。