中環出更：疫潮下變通 貝鈞奇學識電話投注
儘管運動員都具有強健體魄，但不幸中招嘅個案仍陸續出現，惹得體壇人人自危，好多賽事若非閉門，就係延期或取消，連今年嘅東京奧運都破天荒宣布延期至明年舉行。日前卓妮就喺一個場合見到本地幾位體壇重量級人物，其中香港足球總會主席貝鈞奇就話，好多競賽運動都因疫情而蒙上陰影，不過保持樂觀心態，都可以學到新嘢o架。
貝鈞奇話自己間中會入馬場，觀賞賽事之餘，又會投注考吓眼光，不過依家馬場同投注站都閉門，但咁樣反而係一個機會，促使佢向朋友請教如何使用電話投注，都算係活到老學到老喇。唔單止馬場，貝鈞奇話港超聯亦都閉門作賽，佢話足總都好關注球員嘅健康，若有球員抱恙必定盡速處理咁話。
嫌人多 林大輝改踢硬地場
曾經做過足球隊班主嘅香港體育學院主席林大輝，仍然維持定期同波友踢波嘅習慣，不過就嫌踢草地太多人，改為人少少去硬地踢波過吓癮就算。大輝又話，疫情期間屋企人都避免出街做運動，但就喺室內做啲簡單體操郁動吓。至於體院校長李翠莎就話，之前有同確診嘅空手道運動員李振豪講過電話，知道佢依家精神良好，又話佢係專業運動員，相信佢會冇事。對於東京奧運最後係咪可以成功舉行，李翠莎就話體院原則上希望運動員可以繼續訓練，而院方都會鼓勵佢哋積極備戰。
港協副會長兼香港保齡球會主席劉掌珠就話，近期好多國家或地區都向外國人發出旅客檢疫令，增加舉辦賽事嘅不確定性，令好多大型賽事都受疫情影響而取消或延期。不過佢認為無論點都好，運動員都會努力備戰。
卓妮