政情：記者會要保持距離 新聞處慢足兩個月
新冠肺炎疫情已持續兩個幾月，政府高層經常召開記者會公布疫情進展，政府新聞處做嘢慢幾拍，尋日先公布喺政府舉行嘅傳媒活動實施新安排，保持社交距離。
新聞處話一直留意住疫情發展，早排已口頭勸喻出席傳媒活動嘅記者要保持距離，而為咗達到保持社交距離目的，由尋日開始，所有喺特首辦大堂同政府總部西翼大堂會見傳媒環節，將會改喺政府總部地下演講廳舉行，喺演講廳同埋海港政府大樓新聞會議室舉行嘅記者會，將會限制每間傳媒機構的出席人數，每間電視台最多可派出三名代表，其他大眾新聞傳媒機構最多可派出兩名代表出席。
疑因有傳媒員工確診才補鑊
至於場內亦將有相應嘅座位安排，希望盡量減少場內聚集人數，仲有畀記者保持適當距離。
自疫情爆發以嚟，衞生署每日晏晝四點半都有記者會交代最新情況，加上政府高層周不時召開記者會講應對疫情嘅措施，但疫情持續咗兩個幾月後先公布相關安排，唔知係咪因為近日有個別傳媒機構員工確診，所以新聞處先至急急補鑊呢？