政情：郭家麒要求召官員開會 蔣麗芸：書面覆仲快
新冠肺炎疫情持續，本身係醫生嘅議員郭家麒尋日去信立法會衞生事務委員會主席蔣麗芸（Ann），要求盡快召開特別會議，討論喺機場工作嘅醫護人員裝備不足問題。但阿Ann話為咗避免疫情擴散，唔想有太多人喺大樓內聚集，認為政府透過書面回覆跟進議員關注嘅議題會比較適合。
郭喺信中提到，衞生署一名醫生喺機場工作後染病，而佢只獲發外科口罩、面罩同手套，並無着防護衣或者佩戴N95口罩，令人關注喺機場同亞洲國際博覽館工作嘅醫護人員，裝備係咪足夠同合適？佢又認為工業貿易署接受往來香港與內地嘅商人申請豁免出入境限制，有機會成為「播毒」途徑，要求相關官員出席會議，接受議員質詢。
幾百人聚集易播毒
阿Ann接受查詢時話，如果開會傾嘅話會有幾百人喺大樓內聚集，變相拖延時間，最重要係為咗避免疫情擴散，所以佢收到信件後已同秘書處講，要求當局第一時間透過書面回應議員提出嘅問題，認為呢個係最快同最有效嘅方法。
另外，原定下個星期舉行嘅多個事務委員會會議亦都因為疫情關係而延期或取消，包括房屋事務委員會、食物安全及環境衞生事務委員會、資訊科技及廣播事務委員會同教育事務委員會等。