政情：隔空罵戰 葉劉「追究醫護罷工」 歐耀佳「病人失救係廢話」

新冠肺炎疫情自去年年底首先喺內地爆發後，喺農曆新年前都未殺入香港。但政府當時遲遲未有實施入境管制，觸發大批市民不滿，醫護界更有團體發動罷工行動，聲稱要爭取政府實施全面封關。

罷工行動被外界質疑唔合法

於二月三日至七日，數以千計醫護人員參與為期五日、分兩階段嘅罷工行動，公立醫院多項非緊急以至緊急服務均受嚴重影響，外界亦質疑今次所謂嘅工業行動並唔合法。

葉劉淑儀早前話有病人同家屬因醫護罷工影響服務向其求助，更指有病人因醫護人手不足而失救致死。喺醫學會日前召開嘅記者會上，歐耀佳喺回應提問時，批評話有病人因醫護罷工而失救嘅言論「全部都係廢話」，更直指「病患治療受影響同醫護罷工冇關」。

正在家居隔離嘅葉劉淑儀尋日接受傳媒電話訪問時反駁歐嘅「廢話論」，佢仲喺社交平台貼文講番回應嘅內容。

葉劉：待調查不能妄下結論

葉劉淑儀話目前已收到二十幾宗求助個案，當中有三位病人已經過身，佢哋嘅家屬質疑因罷工期間醫院人手不足導致佢哋失救而死。對於歐指嗰批家屬最後都未向市民公開對證，葉劉反駁時強調相關死亡個案尚待調查，唔能夠妄下結論。佢指出，雖然有一名病人嘅家屬以病人年事已高為由放棄追究，但透露另一名病人嘅家屬要求佢協助申請法援，打算循司法程序作追究。

唔單止呢啲投訴，葉劉話有兩名病人原定安排喺二月初進行眼科手術，但手術受罷工影響需要延至兩星期後先可進行，醫生話畀佢哋知已錯過咗進行手術嘅黃金時期，視力無法恢復。

葉劉直指當時罷工嘅醫護唔係合法罷工，因為合法罷工只能提出同工作及僱傭合約相關嘅訴求，但全面封關等要求並唔係醫管局能夠處理，因此醫護嘅罷工性質已經係非法，病人絕對有權保留追究罷工醫護法律責任嘅權利。

話時話，參與罷工嘅醫護人員，到底係放病人利益喺首位，抑或只係理自己嘅政治訴求？呢點真係佢哋自己先知嘞！