中環出更：消防處綱紀敗壞 梁偉雄接掌一頭煙
消防處出現人事變動，政府尋日宣布現任消防處副處長嘅梁偉雄將會喺下個月十八日出任消防處處長，接替喺同日開始退休前休假嘅現任處長李建日。喺舊年爆發嘅反修例示威，有唔少公務員參與非法活動被捕，消防處人員嘅被捕人數更係公務員入面最多，睇怕消防處入面都立立亂，管理出咗問題，梁偉雄上任後都會做到一頭煙喇！
唔單止參與未經批准嘅活動甚至暴動而被警方拘捕，又有紀律部隊成員喺網上或者其他場合發表不當言論，惹起社會爭議，其中消防處就更加係劣迹斑斑。反修例示威以嚟，總共有四十一名公務員被捕，消防處有十一名人員被捕，其中七個係消防員，四個係救護員。
多人示威期間被捕 被斥管理不善
有時事評論員早已批評過消防處管理不善，認為消防作為紀律部隊，更加要督促下屬保持政治中立，仲直言「真係監管得好差」添！又話若果因為不當言論而令紀律部隊之間心生芥蒂，難免對日常嘅救援工作有影響，紀律部隊要喺現場有默契、互相合作o架嘛！
對於消防處處長嘅任命，公務員事務局局長羅智光就話，深信梁偉雄能夠帶領消防處面對未來嘅挑戰。喺李建日同梁偉雄在任期間，有部分消防員就參與非法活動，兩人都要為管理不力負上責任，梁偉雄上任後唔慌唔面對挑戰喇！
卓妮